Subject:  新一季英超四大強隊分析 |
Author:
figo
|
[
Next Thread |
Previous Thread |
Next Message |
Previous Message
]
Date Posted: 22:46:17 08/04/02 Sun
曼聯(Manchester United)---上季雖然以重金買入華朗及雲尼斯達萊,但結果卻四大皆空而回,實在令不少人大跌眼鏡.今季曼聯捲土重來,並以破英格蘭轉會紀錄收購了列斯(Leeds United)既後防大將李奧費甸南(Rio Ferdinand)以改善不穩既後防.
門將方面,巴夫斯(Fabien Barthez)仍然會係曼聯既首席門將.上季佢有好幾次因為玩野而導致失波,最終更令曼聯輸波而回,不過只要戒掉賣弄腳法既壞習慣.巴夫斯依然係一位出色既門將.
後防係曼聯既弱點所在,李奧費甸南既到來,相信可以有助改善後防既問題所在.而同佢拍檔既應該會係經驗老到既白蘭斯(Laurent Blanc).經驗豐富既白蘭斯,已經年屆35歲,面對住一D速度快既前鋒,往往會顯得有心無力,所以兩閘既球員施維斯達(Mickael Siliverstre)同加利利維爾(Gary Neville)往往要移入中間負責包抄.
後防重心球員:李奧費甸南
中場係曼聯最強既地方,由傑斯(Ryan Giggs)同碧咸(David Beckham)係邊線出波所產生既威脅依然係球隊既最大殺著.憑著優秀既盤扭技術,傑斯往往可以係左路以一敵二.而右路既碧咸除左負責傳中外,近一兩季亦多左移入中路作遠射同校炮.而中場既攔截任務會由隊長堅尼(Roy Keane)擔任.至於中場最後一個位置,會由史高斯(Paul Scholes)或者華朗(Juan Sebastian Veron)擔任,而相信史高斯擔任正選既機會比華朗為高.
中場重心球員:堅尼
前鋒線方面,由去屆英格蘭足球先生得主雲尼斯達萊(Ruud Van Nistelrooy)與「娃娃臉殺手」蘇斯克查(Ole Gunnar Solskjaer)組成既「白雙煞」入球能力甚強,雖然去季季中簽入烏拉圭(Uruguay)既年輕前鋒科蘭(Diego Forlan),但預料負責係前線攻堅既仍然會係雲尼斯達萊搭蘇斯克查.
前鋒重心球員:雲尼斯達萊
總結:攻擊力強一向都係曼聯所引以為傲的,但如未能解決後防不穩的問題,隨時會重現上季四大皆空既厄運.
利物浦(Liverpool)---前季成為杯賽三冠王既利物浦,上季雖然未能贏取任何錦標,但整體成績其實不差.聯賽排名第二,歐聯方面亦能殺入八強.今季利物浦大肆擴軍,簽入多名中前場球員,絕對有力挑戰今屆聯賽錦標
上季有突出表現既波蘭(Poland)門將杜迪克(Jersy Dudek),繼續會係利物浦既第一把交椅.
後防方面,一對中堅軒索斯(Stephane Henchoz)與希比亞(Sami Hyypia)上季表現出色,而左後衛賴爾斯(John Arne Riise)上季既表現令人眼前一亮,他們三人加上已經復出既巴布(Markus Babbel),為利物浦築成一道嚴密既防線,其他球隊要射破佢地既大門實非易事
後防重心球員:希比亞
中場方面,利物浦雖然擁有許多中場球員,但貝加(Patrik Berger),班比(Nick Barmby)狀態無復當年勇,史米沙(Vladimir Smicer),梅菲(Danny Murphy)狀態反覆,謝拉特又經常受傷,所以候利亞令季引入了三位中場球員,包括:防守中場戴奧(Salif Diao)及戴亞拿(Alou Diarra),與及可打左中場及中場中路的捷奴(Bruno Cheyrou),以作替補之用.防守中場夏文(Dietmar Hamann)係球隊既必然正選,缺少左佢,利物浦既中場防守能力便會大減,佢同謝拉特(Steven Gerrard)會係利物浦中場既命脈.右中場方面,由於保耶(Lee Bowyer)既交易臨時告吹,所以相信梅菲(Danny Murphy)仍然會係右中場既首選.而左中場無論係用貝加,班比,抑或係史米沙,都似乎唔係太適合,且看最近係熱身賽有出色表現既捷奴能否成功擔當左中場一職.
中場重心球員:夏文
前鋒線方面,年紀輕輕既奧雲(Michael Owen).憑著飛快既速度,高強既把握力,已經成為了利物浦與及英格蘭不可或缺既一把尖刀,至於佢既拍檔希斯基(Emile Heskey),入球能力其實不太高,不過佢勝在身型健碩,可以衝散敵方既防線,等奧雲有更多空位走動爭取埋門.而新加盟既應屆非洲足球先生迪奧夫(El Hadji Diouf)速度快,技術好,有力威脅希斯基既正選位置.
前鋒重心球員:奧雲
總結:穩健既防線係利物浦既強項,如能改善入球能力較弱及只懂穩守突擊既問題,確係一支實力強橫既球隊.
紐卡素(Newcastle)---紐卡素上季表現突出,其快速既進攻踢法獲得許多人既欣賞.今季繼續由經驗豐富既波比笠臣(Bobby Robson)執教,且看佢能否帶領紐卡素打破三紅(曼聯,利物浦,阿仙奴)龔斷既局面.
門將基雲(Shay Given)反應敏捷,如非停賽或受傷,必定係紐卡素既第一號門將.
紐卡素既一條後防線,將會由老大哥達比薩斯(Nikolaos Dabizas)及艾利洛(Robbie Elliott)帶領一班年輕小將如艾朗曉士(Aaron Hughes),及新加盟既巴布爾(Titus Bramble)鎮守後防.這條後防線相對於其他列強黎講,無疑係較為薄弱的.
後防重心球員:達比薩斯
中場線方面,紐卡素人材鼎盛,上屆演出優異既左翼羅拔(Laurent Robert),除左遠射了得之外,處理死球方面亦有一手,佢同右路既秘魯(Peru)國腳蘇蘭奴(Nolberto Solano)會係紐卡素既側擊泉源.而中場中路既拍檔預料會係史必(Gary Speed)同戴亞(Kieron Dyer).而上季季中加盟既英格蘭U-21成員真拿斯(Jermaine Jenas)及新加盟既應屆歐洲最佳年青球員維亞拿(Ferreira Hugo Viana)相信亦不乏出場機會
中場重心球員:羅拔
前鋒線舒利亞(Alan Shearer)搭比拿美(Craig Bellamy)這對攻擊組合,今季仍然係球隊既入球來源.雖然舒利亞年紀漸大,但他那敏銳的射門觸覺卻沒有減退.另一前鋒比拿美速度甚快,可以藉著其速度去竄擾對手後防或打反擊.
前鋒重心球員:舒利亞
總結:紐卡素既中前場攻力十足,但後防卻並不穩陣,預計仍未足以奪取聯賽錦標,但絕對係一匹攔路虎.
阿仙奴(Arsenal)---上屆絕對係阿仙奴豐收既一季,係眾多傷兵既情況下,憑住眾球員將士用命,成功為阿仙奴奪得聯賽及足總杯冠軍,繼97-98球季後再次成為雙料冠軍.
老將施文(David Seaman)雖然快將39歲,但預計仍是雲格(Arsene Wenger)心目中既正選門將,而從祖雲達斯借用一年過來既烏拉圭門將卡連尼(Fabian Carini),相信亦會有不少既出場機會.
上季雲格銳意將後防線年輕化,今季雲格從列黎(Lille)買入上屆係法國聯賽有穩定表現既中堅施根(Pascal Cygan)黎填補阿當斯(Tony Adams)退休既空缺,進一步將後防線既年齡降低.左閘阿殊利高爾(Ashley Cole)及右閘羅倫(Lauren Biscal)年輕力壯,助攻力強,配合一對中堅蘇金寶(Sol Campbell)同基昂(Martin Keown) /施根所組成既防線, 阿仙奴既防線係值得信賴的
後防重心球員:蘇金寶
季初阿仙奴有三名中場主力皮利斯(Robert Pires),龍格堡(Fredrik Ljungberg),雲邦荷斯(Giovanni Van Bronckhorst)因傷而未能上陣,但伊度(Edu),韋托特(Sylvain Wiltord)),基拔圖施華(Gilberto Silva),柏奴亞(Ray Parlour)都可以填補其位置.當全部主力復出後,阿仙奴既中場線將會更為完整.
左中場皮利斯上季以19次助攻勇奪助攻王美譽,可見佢既傳波同助攻能力超卓.經過半年養傷時間,佢既狀態成疑,不過只要能夠早日重拾佳態,皮利斯仍然係阿仙奴陣中不可或缺的一員.右中場龍格堡係上季季尾狀態大勇,曾連續五場都有入球,協助球隊贏得雙料冠軍.龍格堡既腳法雖然稱不上秀麗,但佢勝在速度快,肯搏肯拼,而且掌握入楔時間準確,經常切入中路後上攻門而取得入球.而兩名防守中場韋拉和基拔圖施華則負責係中場做攔截和掃盪工作.
中場重心球員:皮利斯
前鋒線方面,亨利(Thierry Henry)係上季以24個入球當上英超神射手.速度與腳法兼備既佢,經常於左路發難.如能加強門前既把握力,亨利既威脅力必定更大.亨利既拍檔會係近年擔任後上前鋒既柏金(Dennis Bergkamp).柏金雖然已經33歲,氣力未必足夠打足全場,但佢卻沒有一貫荷蘭(Holland)球員既通病---早熟早殘.相信今季佢雖然唔可以打足全部賽事,但只要佢一落場,阿仙奴既攻力必定會大增.
前鋒重心球員:亨利
總結:阿仙奴三線平均,如果能夠克服季初中場傷兵問題,衛冕聯賽冠軍仍然係樂觀的.
[
Next Thread |
Previous Thread |
Next Message |
Previous Message
]
| |
Feedback: 