投資者日記流水不腐 -- 皮蛋．黃．在家

[ Show ]

Support VoyForums

[ Shrink ]

VoyForums Announcement: Programming and providing support for this service has been a labor of love since 1997. We are one of the few services online who values our users' privacy, and have never sold your information. We have even fought hard to defend your privacy in legal cases; however, we've done it with almost no financial support -- paying out of pocket to continue providing the service. Due to the issues imposed on us by advertisers, we also stopped hosting most ads on the forums many years ago. We hope you appreciate our efforts.

Show your support by donating any amount. (Note: We are still technically a for-profit company, so your contribution is not tax-deductible.) PayPal Acct: Feedback:

Donate to VoyForums (PayPal):

[ Login ] [ Contact Forum Admin ] [ Main index ] [ Post a new message ] [ Search | Check update time | Archives: 1, 2, 3, 4 ]

[ Next Thread | Previous Thread | Next Message | Previous Message ]

Date Posted: 21:32:49 09/30/03 Tue
Author: 曹Sir
Subject: 投資者日記流水不腐

9月28日，周日。今午茶座，人未坐定，伙記已粗聲粗氣問要D乜，我老曹微笑話可否等一下，點知個伙記突然變臉然後走咗去。未到10月黃金周，香港飲食業的招呼又再差咗許多，理由係第二季沙士疫情影響下，唔少食肆老細取消員工福利，依家生意已旺番，但係老細仍未識do提吓加人工，部分員工感覺到「工作就有得加，人工話減就減」，所以做嘢都好晦氣。

咁嘅服務態度返晒嚟

　　今時今日「咁嘅服務態度」又再返晒嚟，唔少朋友出街食飯往往搞到一肚氣，仲同我老曹呻，寧可逼車返深圳消費，都唔肯喺香港受氣，唔通真係學壞三天學好三年，香港飲食業旺番唔夠三個月又……。

　　今時今日，股市既不昂貴亦唔便宜，踏入第四季大幅上升機會同大幅回落機會都唔大，股市繼續玩選股遊戲，形成短期賺錢愈來愈唔容易，只要投資者對公司公布純利有少少唔滿意，股價便回落；公司前景略為睇好，又可刺激股價上升。資金由銀行存款流入股市，代表佢地係比較小心謹慎一派（不然亦唔會將存款留到今天），過去三年股市表現亦教曉佢地何謂「上落市」。大家都明白，今時今日仍係周期調整（cyclical rally），至於新牛市依家未獲確認。

　　大市4月至今連升五個月，有良好管理、良好純利展望及嚴守紀律的公司，股價已唔再便宜（好嘢冇平）；反之，管理上有缺點、純利展望欠佳、公司未有嚴守紀律者，又唔值得投資（平嘢冇好），唔似4月份通街好嘢冇人買。今時今日制訂投資策略，我老曹嘅意見宜保守（10-15％黃金，10-15％股票，其餘係外幣存款）。

金價第三次是真突破

　　美元在G7聲明要求彈性匯率政策後大跌一天，之後又再企穩，因美國財長強調強勢美元政策仍然有效。日圓在111水平再回落，因為日圓如再升值，必驅使日本廠家進一步將製造業工序出口到中國。雖然國際間一連串逼人民幣升值的言論，但中國乃太極高手；換言之，擾攘一番後外匯市場冇事發生，相信日圓在110至115水平上落，取代過去在115到120水平上落；美元弱勢2001年開始，到咗今年6月後有條件暫時企穩。

　　由於聯匯制度，港元亦追隨美元貶值，令進一步貶值壓力大減。最近大量資金流入股市，更一度推高港元匯價到七點七五兌一美元（唔好誤會別人炒港元升值），但周五成交額已回落，可能反映資金流入已告一段落。

　　比較令人意外嘅係，OPEC減產令到金價一度見三百九十三點五美元今年新高，但又迅速回落，代表只係一次突破，黃金收集期仍未完成。金價長期趨勢向上，理由係美國收支赤字今年接近五千億美元，相等於GDP 5％，明年可能佔GDP 6％，但猜測黃金短期價格有如分析第幾場第幾隻馬會贏一樣，運氣起碼佔八成半以上，係智者所不為。我老曹能夠講嘅係金價仍然反覆向上，但對於真正出現較大升幅邊日開始便木宰羊。

　　踏入6月15日後，股市變成極之不穩定，其中一個理由係銀行存款利率太低，大量資金冇正常出路；另一個理由係大量衍生工具影響下，令股市迷失方向，股票市場漸漸變質成為另一個賭場，恆生指數每一點升跌皆有人賭，大量對沖基金出現以專業人士眼光去捕捉短期趨勢。各位回望2000年至今，股市出現幾多次大上落？電視台及電台亦花大量時間報道及分析短期大市方向，可以話大量短線客充斥市場，令真正投資者退出股市！炒短線完全取代長線投資者，因此真知灼見者已冇市場，無聊意見到處都係，例如猜測大市下周會否上升幾多百點。

　　大市9月開始進入建頂期，但出貨訊號未現，冇人知道頂喺邊度。值得注意嘅係，美股在轉弱中，阿殊聲望下降，至於金價創今年新高位後便迅速回落，通常第二次創新高價都係虛假訊號，到第三次才係真嘅；黃金暫時仍處收集期。艾登姊妹花認為只要金價企於三百六十二美元以上便無損上升軌。金礦年產金二千五百噸，需求早已超過此數字，未來三年金礦產量將進一步回落！阻止金價上升唯一力量來自央行拋金！事實上，各央行早已借出一萬至一萬六千噸（佔總存量30％－50％）畀珠寶商作周轉之用，利息係零點五厘到一厘（以金計算），由於過去兩年金價上升，實際利率其實好貴，隨著中國政府今年8月放寬黃金管制，未來數年十三億人口的需求遲早達五百噸一年！全世界黃金加起嚟亦只值一萬億美元，可以話少得可憐，只要需求多DD，立即可令黃金價格出現大改變。

政府限制投資乃貧窮原因

　　著名經濟學家索托（Hernando de Soto）在2000年寫成的著作《The hour of capitalism's greatest triumph, is its hour of crisis.》中，認為資本主義只有在西方國家才能欣欣向榮，最大理由係西方國家的冒險精神。他以最貧窮的拉丁美洲國家海地為例，1804年脫離法國獨立經濟便走下坡，至今二百年方向仍未改變，背後理由係海地人喜歡儲蓄，連最窮的海地人手上亦略有儲蓄，今天海地人手上儲蓄係海地過去二百年所收的外資的一百五十倍，點解海地仍如此貧窮？所謂流水不腐，海地人喜儲蓄不喜投資，結果資金變成「死水」，同樣情況在菲律賓、埃及、秘魯、委內瑞拉等貧窮國家出現；另一理由係政府對投資限制多多，除非非法，不然完成一項投資往往涉及政府五十三個或以上部門，需時十年或以上，令人民視投資為畏途！

　　點解窮國家必須引入外資才可繁榮？理由係政府官員認為外資可解決國內就業問題，所以給予外資優待，從簡批准一項投資，結果引入外資，經濟便好轉。以中國為例，過去二十五年亦引入唔少港資以至外資。其實，所有貧窮國毋須引入外國資本，國民本身已有資本，但佢地唔投資，「活水」變成「死水」，理由係政府管得太死，投資必須同官打交道。上述見解值得香港官員注意，回歸後政府會否對投資管制太多？香港人係咪由喜歡投資轉為喜歡儲蓄，將資本變成「死錢」？90年日本經濟步入衰退，理由係大企業投資一步步萎縮，日本人儲蓄習慣仍然未改，漸漸將資本鎖死。97年香港房地產失去投資價值，香港人會否同日本人一樣漸漸將資本鎖死？

儲蓄率視乎對未來收入預期

　　另一著名學者莫狄格里尼（Franco Modigliani）研究人類儲蓄行為（life-cycle saving theory），佢反對凱恩斯理論認為「人的收入愈多儲蓄便愈多」論。他於54年發表論說，認為「現階段消費由估計一生人收入多少決定」，乃殿堂之作。佢認為，年輕時儲蓄少消費多，理由係相信自己未來收入將上升；中年時儲蓄多消費少，因為要為未來退休打算；老年時不儲蓄甚至動用本金去消費，因為未來收入已有著落。人習慣消費相同數額金錢去維持佢心目中的生活水準，一個家庭習慣消費六十萬元一年，如呢個家庭擁有一千萬元存款銀行利率六厘，即每年收入六十萬元，該家庭會傾向唔儲蓄，因為未來收入應足夠應付未來開支；反之利率由六厘降至一厘後，反而令該家庭增加儲蓄，因為該家庭認為未來收入只有十萬元一年，必須為未來開支擔心而儲蓄。換言之，一個人的儲蓄率由他預期未來收入多少去決定！此乃2001年減息香港經濟未見好轉反而衰退之理由。原來減息令人增加儲蓄，而非凱恩斯所說增加消費。

　　上述行為亦可解釋貧窮國家人民點解咁鍾意儲蓄，理由係對未來收入擔心；反之，西方國家有良好福利制度，西方國家人民儲蓄率低投資率高，形成良性循環。

　　去年美國在貧窮線之下的人口三千四百六十萬元，佔總人口12.1％（2001年佔11.7％）；中等家庭收入下降1.1％，至四萬二千四百零九美元；貧窮家庭共七百二十萬戶（2001年六百八十萬戶），係連續第二年上升；2000年貧窮家庭只佔11.3％。九十年代美國家庭收入不斷上升，但2000年起已停止（貧窮的定義係一個人年收入少於九千三百五十九美元，兩個人收入年少於一萬二千零四十七美元，三個人其中一個係少於一萬四千四百八十美元，一家四口少於一萬八千八百五十九美元）。或者有人認為美國將貧窮線定得太高，但證明富裕如美國一樣有12.1％係貧窮人口，但中國卻有三分二人口列入窮籍。美國所謂貧窮仍有溫飽，但中國人的貧窮境況往往令人鼻酸。

　　創造財富與如何分配財富，係人類自有社會組織以來困擾至今的問題。49年中國共產黨取得政權，52年開始的「土改」令經濟一步步走向平均主義。經二十五年努力，中國人收入相差最多二點五倍（76年流行「做又三十六唔做又三十六」）。貧富收入差距的確收窄，但結果係全民皆窮！78年鄧小老提出改革開放政策至今又二十五年，中國四億人口的確富起來，大部分屬沿海省市，但九億內陸人口又如何？兩者收入差距已擴大到八倍，加上國家政策容許人口流動，內陸省份人口大量湧到沿海省市變成打工妹，為工廠提供源源供應不絕的廉價勞動力。由於政府提供的教育經費不足（只佔全國GDP 2％，聯合國標準係6％），只有53％，中國下一代即使有免費教育，犧牲的必然係較貧窮的內陸省份。教育的差距為將來製造更大收入差距，今天中央政府當務之急係如何令九億仍未富起來的中國窮人生活得到改善，開發大西北希望唔係得個講字！

[ Next Thread | Previous Thread | Next Message | Previous Message ]