Subject:  玻璃光管字行騙 –又一單 |
Author:
大隻廣
|
[
Next Thread |
Previous Thread |
Next Message |
Previous Message
]
Date Posted: 22:40:22 01/07/02 Mon
睇到 Saltyfish 既留言都係兩日, 原來呢D手法已經流行起黎! 連廣州都有...話說昨日我在廣州天河火車站, 要去中國大酒店, 見唔趕時間, 就坐公共巴士. 上車我都揀最後個排坐, 無謂後褲袋成為目標. 車上冇乜人, 座位都坐唔滿. 車將到我想落車個站, 我提前起身諗住坐近車門個位. 就係我起身時, 前兩個位有條老坑剛又起身, 腳步蹣跚咁阻住條路, 我迫於要閃身係佢旁邊過 (後來回想呢個係重要部署之一, 迫我側身向佢同黨果邊側過去).
行過後, 我再係車門旁坐低, 此時有D小玻璃管散在地上, 有條友破口大罵, 話我撞到佢. 此人手拿如 Joker 所講一樣既九曲十三彎霓虹管之類. 我只肩挽一個小皮包, 經過佢身旁根本冇乜野碰撞到佢, 條友仲喊打, 我無名火起, 即狂小佢. 跟著有條講廣州話既中年漢就半勸半說我, 話 "你撞到人唔好嘈啦, 講聲對唔住算啦" 我收聲. 剛到站我即落車, 落車時我側頭見到勸我條廣州佬同阻路條老坑講野.
落車後我回頭見到個條手拿光管既友, 同另一民工模樣靚仔, 重有條廣州佬及其他乘客落車, 破口大罵條友追上黎, 我隱約覺得有下文, 快步走向路旁間小商店. 商店門口放有幾部電話, 條友追上黎話我撞爛佢D野, 要我同佢老細講清楚. 此時我已明白又係 Saltyfish 所講果D局, 我都費事同佢多講, 囉起電話打 110. 條友一手禁住個電話, 我就目露兇光同佢講 "你話我打爛你D野, 我而家就叫公安黎處理, 公安話要我賠錢我就賠, 要我坐監我就坐, 你咪撚走添呀!" 隨手即囉另一個電話即撥110, 條友見勢色唔妥, 就死死氣走人.
事後諗番, 再睇到 Joker 個 similar case, 成個局起碼有四條友, 攔路老坑, 兩條友囉光管, 廣州佬事後會扮演老細之類. 但我冇俾機會佢地演哂成套戲. 客觀環境對我有利, 車站係大街大巷, 人來人往, 路旁有小商店可打電話, 我有手機都唔囉出黎用. 再者有乜依郁, 我可衝入商店, 混亂起黎殃及商店, 佢地都會叫公安. 加上呢班仆街係騙唔係搶, 作賊心虛, 我聲大夾惡, 目露兇光, 佢好明顯有d怯. 各位兄弟北上, 小心呢類近期當紅騙局.唔好彩撞正, 我覺得堅持報公安會好d.
見 Big Stud 揶咸魚大夫, 我補充下我真係打110同佢講, 問左商店老板個詳細地址, 110個後生女話派公安黎, 我見有後緩即撲番出去巴士站刮個幾條友. 如果公安黎到又括到個班仆街, 我諗住俾一兩百d公安, 同我打鑊金既班騙子架. 點知等左十分鐘, d死公安重未蒲頭, 班仆街騙子又不知所終, 唯有走人．
[
Next Thread |
Previous Thread |
Next Message |
Previous Message
]
| |
Feedback: 